Autonomi Erkidegoko gobernua PP eta PSOEren artean osatu zuten egunean hodei beltzak ikusi genituen euskalgintzan ari garen askok; orain, Espainiatik datorren ciclogénesis explosiva berri baten iragarpenak kezkatzen gaitu. PPk hasieratik erakutsi zuen euskararen aurrean duen gorrotoa eta fobia, euskararen alde egin zitekeen edozein ekintzaren aurrean diskriminazioaren mamua zabalduz; PSOEk, aldiz, polikiago ibiltzea gomendatzen zuen; helburu bera, erritmoa desberdina, besterik ez. Hitz onak hasieran, baina, iritsi da eguna, hasi dira!
Eskoletan teknologia berrien abantailaz eta inplementazioaz ahoa beteta hitz egiten ari dira etengabe. Ikasgelak ordenagailu eta tramankulu elektronikoz bete dituzte, baina, edukiaz ezer gutxi esan dute. Hizkuntza politikaz, hirutasun sainduaren antzeko lanbro makurra zabaldu dute eta mundu garatuaren irakaskuntza plangintzetan e-learnig edo Internet bidezko irakaskuntza aitzindaritzat hartzen denean, Autonomi Erkidegoko gobernuak irakasleen euskara-formaziorako IRALE programatik On-line eta autoikaskuntza aukerak ezabatu egin ditu, dekretuz, aurretik ezer esan gabe, horretan ari garenoi galdetu gabe.
Erabaki horrekin PP-PSOE alderdiek argi erakutsi dute irakasleen formazioan, eta Hezkuntzan oro har, herri honen berezko hizkuntzaren aurrean duten jokabidea. Ehunka irakasleri bide hori itxi egin die, orain arte tresna horren bidez euskara hobetzeko saio arrakastatsua egin dutenei sistema horretan euskara hobetzea debekatu egin die. Nonbait, Internet eta teknologia berriak beharrezkoak dira, baina, ez euskararentzat. Mendeak daramate, amarruz, debekuz, zigor bidez… Espainia elebakarra inposatu nahian, baina porrot egin dute, eta horrela egingo dute aurrerantzean ere. Espainiatik datorren ekaitz bortitz honek kalte handiagoak eragin baino lehen, ea hauek alde egiten duten eta denon artean gure herriaren hizkuntza eta identitatea errespetatuko dituzten erakundeak berregituratzen ditugun.
