Euskaraldia ezohikoa izan dugu aurten, analogikotik digitalera zirkunstantziek behartuta eta, beraz, beste urte batzuetako kaleko parte-hartzea txikia izan da benetan, ezin bestean. Euskaraldiak 15 egun ditu, eta euskarak 365: normaltasunez euskaraz bizi ahal izatea alegia, trabarik gabe. Zer berri arlo horretan Euskaraldian euskaraz bizitzeko eskubideaz? Euskarazko poema bat gordetzen zuen 1508-1522ko poema bat agertu da, albiste ederra dudarik gabe, nahiz eta horrek nire eguneroko euskarazko komunikazioa hobetuko ez duen. Tira, Vox izan ezik, edonor poztuko da deskubrimendu horrekin (edo ez?). Gutako gehienek bezala, bitarteko digitalen bidez izan dut poemaren berri, beharbada EITBren webgunearen bitartez.<\/p>\n
Duela hilabete inguru hasi zen Euskaraldiaren kanpaina, eta EITB izan du haren iragarle nagusietako bat. Itzultzailea naiz, wikigintzan boluntario, eta goizeko irratia ordenagailuz entzuten dut. EITBren webgunera joan naiz, askotan egin ohi dudanez. Besteak beste, Euskaraldia iragartzen zuten neska-mutil dantzariak eta kolore biziak espero nitzakeen bertan, baina trukean zer agertu eta pop-up<\/em> mezu bat, ia pantaila erdia betez: \u201cen eitb nos preocupa mucho su privacidad\u201d ACEPTO \u2013 CONFIGURACI\u00d3N \u2013 RECHAZAR\u201d. Hara! Zer da hau? Nire baitarako harrituta eta deseroso. Mezua eldiario.es<\/em> espainiar egunkarian agertzen den berbera da.<\/p>\n Tira, bizpahiru egun itxaron ditut, zuhurtziaz pentsatuz presa batean jarri behar izan dutela, eta bizpahiru egunetara-edo euskaratuko zutela, lehen orria bederen, Euskaraldian gaude! Erratua ni. Deitu dut Miramonera, ea zer gertatzen den, nabigatzailea eta sistema eragilea euskaraz konfiguratuta ditudala eta, hala ere, mezu (inbaditzaile) hori agertu zaidala. Mezua hartu dit telefonoz bestaldeko emakumeak, baita izena ere. Zain geratu naiz pixka bat, baina ezer berririk ez: mezu berbera, ordenagailu desberdinetan. Erantzunik ez. ACEPTO botoi horrek pozoi tentagarri baten irudi iluna ekarri dit gogora, eta bere horretan utzi dut fitxa irekita, metafora bihurtuta, pantaila erdia \u201cnos importa mucho su privacidad\u201d mezua eta bestean eitb-ren webgunea, Euskaraldiko iragarki koloretsuak ikusgai dituela.<\/p>\n Euskaraldia aurrera doa, 15 egun pasa, eta EITB webgunera joan naiz (fitxa desberdinetan), eta mezu berbera pantaila ia erdiz: \u201cen eitb nos preocupa mucho su privacidad\u201d ACEPTO \u2013 CONFIGURACI\u00d3N \u2013 RECHAZAR\u201d. Lagun batek Behatokira bidali du salaketa, nik behar nuenean, baina ez naiz lasai geratu, eta hemen nago, azkenean artikulu bat hobe delakoan. Norbaitek Euskaraldiaren kontraprogramazio digital eraginkor bat egin nahi izan badu korporazio publikotik bertatik, eraginkorra izan da; egin nahi izan ez badu (hau pentsatu nahi dut noski), barne komunikazio arazo latza dute, aldi berean mezu bat eta kontrakoa igorriz. Hori da artea!<\/p>\n