<\/p>\n
Maddi Ane Txoperena Iribarren<\/p>\n
Berria<\/p>\n
Frederique Davous Paueko epaileak deliberatu du Ziburuko ikastolak eskolatik alde egin behar duela.
Astebeteko epea du ikastolak bertze leku bat bilatzeko<\/p>\n
Gaur izanen dute lehen eskola eguna Ipar Euskal Herriko haurrek. Ziburuko ikastolako ikasleentzat, ordea, sartze berezia izanen da aurtengoa. Izan ere, Paueko Administrazio Auzitegiko Frederique Davous epaileak atzo ebatzi zuenez, Ziburuko ikastolak Marinela auzoko eskola publikoa utzi beharko du jakinarazpena jaso eta zazpi egunera. Agindua bete ezean, eskolan gelditzen diren egun bakoitzeko 100 euroko isuna ordaindu beharko dute.<\/p>\n
Deliberoak harridura sortu du ikastolako ordezkarien artean. Izan ere, Laida Mugikak adierazi duenez, uste zuten halako zerbait gerta zitekeela, baina ez zuten uste kanporatze epea hain azkarra izanen zenik: \u00abPentsatzen genuen azarora arte utziko zigula denbora, hurrengo oporrak arte, dena pixka bat lasaiago aztertzeko\u00bb. Epaileak denbora askorik ez die utzi, baina. Hain zuzen, jakinarazpena jaso eta zazpi egunen buruko epean erabaki beharko dute hamabi ikasleekin zer egin. Gaur, dena den, normal hasi nahiko lukete sartzea. \u00abGelditzen zaizkigun zazpi egun horiek ongi aprobetxatuko ditugu, eta astea pasatuko dugu atzematen aterabideak, ezker-eskuin galdegiten\u00bb, azaldu du Mugikak.<\/p>\n
Sententzia bereziki bi punturen gainean oinarritzen da. Alde batetik, epaiketan epaileak adierazi bezala, baieztatzen du ikastola eta Ziburuko Herriko Etxearen arteko hitzarmena baliogabea zela. Urgentzia da aipatzen duen bigarren argudioa. Izan ere, sententziak dio ikastolako bi prefabrikatuek \u00abtraba\u00bb egiten dutela eskolako ikasleek azaroaren 3an sartzea egin dezaten. Testuak zehazten du udan prefabrikatu horiek egoteak obrak \u00abgibelatu\u00bb egin dituela eta hor segituz gero arriskuan jar dezaketela eskolaren \u00abfuntzionamendu egokia\u00bb. Hortaz, epaileak ondorioztatu du presazkoa dela ikastolak Marinelako eskola uztea. Mugika, ordea, ez dago ados presaren argudioarekin. Haren ustez, \u00abgezurra da, zeren eta egiten ahal baitituzte obrak hori kendu gabe ere\u00bb.<\/p>\n
Haurrentzako alternatiba<\/strong><\/p>\n Bi puntu horiez gain Seaskako kideak gehien harritu dituena da sententziak diola Ziburuko ikastolako haurrek badutela alternatibarik. \u00abAgindu honek kontuan hartzen ditu Seaskak Ziburun hartu nahi zituen hamabi haurren interesak\u00bb, dio sententziak. Bi alternatiba aipatzen ditu Ziburuko ikastolako haurrentzat: alde batetik, erraten du Ziburuko Herriko Etxeak eskaini diela behin-behinean eskola publikora joatea. Aukera horrek ez du kontuan hartzen, ordea, haurren gurasoek egindako hautua, hots, euskaraz ikastea. Izan ere, Ziburuko eskola publikoan ez dago irakaskuntza guziz euskaraz egiteko aukerarik.<\/p>\n Zibururen mugakide diren Donibane Lohizune eta Urru\u00f1ako ikastoletara joatea aipatzen du, bestalde, sententziak. Zehazki, erraten du ikastolako ordezkariek auzian baieztatu zutela badagoela haurrentzako lekua ondoko bi herri horietako ikastoletan.<\/p>\n Ikastolako ordezkariek, alta, gezurtatu egin dute azkeneko puntu hori. Mugikak adierazi duenez, \u00abepaileak gaizki ulertu du, zeren eta Paxkal Indok justu alderantzizkoa erran zuen; erran zuen ez dela lekurik Donibane eta Urru\u00f1ako ikastoletan\u00bb. Hur Gorostiaga Seaskako zuzendaria ere kexu agertu da testuaren zati horregatik: \u00abPaxkal Indok ez zuen batere hori erran, baina epaileak bere burua zuritzen du\u00bb.<\/p>\n Galdea herriko etxeari <\/strong><\/p>\n Ziburuko ikastolaren aurkako sententziak ez du zehaztapenik ematen herriko etxeak hartu beharreko ardurari buruz. Mugikak azaldu duenez, epaileak ezin zuen halakorik egin: \u00abEpaiketa zen bakarrik Marinelan genuen hitzarmenari buruz: egoten ahal garenez edo ezin garenez egon\u00bb.<\/p>\n Hala ere, Seaskako eta Kaskarotenia ikastolako kideek argi dute herriko etxeari eta Guy Poulou auzapezari eskatuko diotela bertze aterabide bat bilatzeko. \u00abBerriro ere herriko etxeari galdegiten diogu zerbait proposatzea\u00bb, tematu da Mugika. \u00abBilkura bat galdeginen diogu: azken aukera, elkarrekin hitz egin eta herriko etxeak zerbait egin dezan\u00bb.<\/p>\n Herriko etxeak hitz egiteari uko eginen badio ere, ez dute geldirik egoteko asmorik. \u00abGuri ez zaigu burutik pasatzen ikastola ixtea: ez da posible. Ez dugu hau dena egin gero ikastola ixteko\u00bb, esan du Mugikak. Bestalde, instituzioen babesa nabarmendu du, eta oroitu du Frantziako Hezkuntza Nazionalak ordaintzen duela Ziburuko ikastolako irakaslearen soldata, eta inspektoreak \u00abbegi onez\u00bb ikusten duela.<\/p>\n Atzo arratsaldean bildu ziren ikastolako gurasoak ikastolako zein Seaskako arduradunekin, aitzina begira dauden aukerak aztertzeko.<\/p>\n Sare sozialetan babes zabala izan zuen atzo arratsaldean Ziburuko ikastolak: bertzeak bertze, EH Bilduk, Euskal Herrian Euskaraz-ek eta Seaskaren Lagunak elkarteak sostengatu dute.<\/p>\n \u00a0<\/p>\n Arazo bat Ziburun, arazo Euskal Herrian<\/p>\n Naiz<\/p>\n Paueko Administrazio Auzitegiak Ziburuko Kaskarotenia ikastolari astebeteko epea eman dio egun erabiltzen duen eraikina utz dezan. Horrez gain, epe horretatik aurrera, bertan jarraitzen duen egun bakoitzeko ehun euroko isuna jarriko diola mehatxu egin dio. Mahai gainean zituen hiru aukeren artean, epaileak ikastolari eta bertan ikasten duten haurrei kalte handiena eragiten diena hartu du, eta ataka larrian jarri ditu bai ikastola bera bai haurrak. Izan ere, Seaskako zuzendari Hur Gorostiagak iragan ostiralean nabarmendu zuenez, Marinelako guneaz aparte ez dute klaseak hasteko bestelako lekurik. Eta gaur hasiko da ikasturtea…<\/p>\n Argi dago, beraz, arazo bat dutela Ziburun. Eta ez bakarrik ikastolan izena emanda dauden hamabi haurrek edo haien gurasoek, baizik eta euskarak, euskal hezkuntzak eta euskal kulturak pixkanaka bada ere bere lekua har dezan lanean ari diren herritar guztiek. Are gehiago, gertatutakoa arazotzat jo beharko lukete euskal hizkuntzari errespetua dioten guztiek. Eta Ziburun arazo bat dute, batez ere bertako Herriko Etxeak arazo bilakatu nahi izan duelako, eta euskararekiko zein haurren hezkuntza eskubideekiko sekulako axolagabetasuna erakutsi duelako. Herri hauteskundeak izan eta hain denbora gutxian auzapezak horrelako jarrera oldarkorra agertzea berri txarra da, zinez, ziburutarrentzat. \u00a0<\/p>\n Ziburu. El ayuntamiento desahucia a 12 ni\u00f1os \u201ccontra-revolucionarios\u201d<\/strong><\/p>\n
Baina Ziburun arazo bat duten bezala, arazoa, letra larriz idatzita, Euskal Herriak dauka, berriro ere instituzio arrotz batek zuzenean eragiten dion gai batean bere kalterako den erabakia hartu duelako eta betearaziko duelako. Kasu honetan Paueko Auzitegia izan da \u2013euskaldunoi kalte egiten esperientzia luzea dauka auzitegi horrek\u2013, baina beste batzuetan beste epaitegi, administrazio, gobernu ordezkari edo polizia batzuek izaten dira gure herriari buruz erabakitzen dutenak, Ipar Euskal Herrian zein Hego Euskal Herrian. Eta hori aldatu ezean, euskal herritarron eskubideek esku arrotzen menpe jarraitzen duten bitartean, arazoak bere horretan jarraituko du. Ziburun eta Euskal Herri osoan.<\/p>\n